本帖最后由 Alan Tsang 于 2021-1-15 08:32 编辑 留意番．一：係我最喜愛，唔等於係你最喜愛。我嘅入住期望只係一個正常普通嘅香港人。早checkin 遲 checkout 老馮Upgrade唔係必然。
留意番．二：大部分都係2020年嘅評論，都係自費套房住宿，冇收廣告。
留意番．三：房價可升亦可跌，每口價包嘅服務都唔同，疫情期間住宿嘅設備亦有開有關。
位置：香港四季酒店位處於港鐵香港站上蓋，係中環核心地段，IFC 商場同辦公大樓喺正隔離，對於商務旅客同渡假血拼遊客都非常之方便。亦因為酒店位置於中環海旁，好多房間（包括所有套房）都可以飽覽維港一帶景色。簡單來講：冇得輸。
房間：設計分東方色彩同西式，感覺比較「舊」，但保養維護很好，沒有「殘」嘅感覺。套房有落地玻璃窗，飽覽維港。電視機雖然尺寸有啲細（以套房大小計），但係用上Sony Bravia ，絕對畫面靚。梳化餐枱辦公枱Mini Bar一應俱全。床褥相對比較軟，不過若果唔啱心水，可以有不同嘅硬度選擇。浴室大，浴缸側面有小窗可看風景（不過冇乜好睇）。浴鹽都有兩款可以選擇。浴室備品係Bvlgari，香噴噴。
設備：健身房超大，游泳池很Chill，更衣室更有一流水療設施，冷熱浴池、桑拿蒸氣室（可惜關閉了），絕對適合做完運動或者準備享受Spa嘅人。行政房與及套房嘅住客可以使用四十五樓嘅行政貴賓室 Executive Lounge，一邊食早餐或下午茶，一邊享受海邊美景，又話者黃昏時間，一度飲香檳一度睇日落。
餐飲：入住其間冇食酒店旗下嘅米芝連餐廳，不過食物出品水準出色。早餐在Lobby Lounge 及 Executive Lounge 吃過，沒有試過room service。Lobby Lounge 係可以叫set breakfast 或不同散點 item，幾本上若果房價已包早餐，係可以任叫任食（不過記得唔好做大嘥鬼）。中式西式日式健康式都有，都好好食。😋下午茶試過係Lobby Lounge、Executive Lounge同 Room service 食過，係四季酒店出名嘅下午茶，同你平時要訂枱食嘅係冇分別，唔留肚食就真係大嘥鬼。😝黃昏雞尾酒就喺 Lobby Lounge 叫小食加酒精飲品 menu，亦試過直接包1400港元一晚嘅 dining credit，可以喺 Lobby Lounge 或 Room Service 叫嘢食，超荀！食物質素好好，第一次食到件 room service 卻有扒房級數嘅牛扒。
服務：Nice。所以人都親切有善，部分員工更可以記得我個姓。呢度冇管家服務，不過四季酒店自己個 App 有 chat service，有真人問答，幾時執房 Turndown 叫下午茶都做得到。生日入住更加送上蛋糕同香檳，每晚開床服務有唔同嘅特色小食，服務一流。
備註：酒店裝修中，預計2021年第一季完成。相信裝修完應該會更加新淨。
[复制链接]
